Poetic collages
Click on the images to see a larger version
Ukubusa Kwezinambuzane
Ngibubona utshani buthobathoba
Naphezu kwabo izinambuzane zisina
Emuveni kuyile ntaba ikhazimula
Ngamanzi ayo awa ikhala
Kusekuseni, izinyoni zivakashela
Isihlahla siziph’ amagatsha simile
Igama lale ndawo engilazi liyacasha
Kunelinye engingalazi liyacosha
Lolu xolo lugcinwe izinambuzane
Ezidika zicula ngezibalo zazo
Abekho abantu lapha ngobuninginingi
Kepha izilokozane zakhona ezibusayo
Amagam’ azo kakade sawalahla
Kude eziqongweni ngisazi zikhona
Lapho phezulu kungagibeli muntu
Hayi ngenxa yokweswel’ isibindi
Kodw’ asinyatheli lapho singafuni ukukubusa
Ekugcineni kwawami amagama, ngiphefumula
Inkondlo Yombuso Ongenagama
Bengizothi nampa la mandla asizungelezayo
Kodwa angabonakali emehlweni enyama
Kungukujonga ngomoya okwazi ukuthukulula emaqinisweni omhlaba
Nokukhipha okusanyongo yokusazibilini zomzimba wendawo
Bengizothi nansi indlela amandla abusa ngayo
Kalukhuni, kancane, kanzima, kamnene, ngokuba kude, ngokuba seduze, ngokuphatha, ngokuthanda, ngokukhulisa, ngokuqeda, ngokuphilisa, ngokubulala
Asuke phansi aya phezulu
Avela phezulu aqonde phansi
Ayawela, ayeqa, ayema, ayahamba
Aqale emuva aqhubeke phambili
Ame phambili ahlehlele emuva
Bengizokubonisa lokhu – konke kwalokhu!
Akubonakali ngaphandle kokuncipha kwamahlathi, nezimbila, nokungcola kwemifula namachibi
Nokwanda kwamadolobha, kwamakhukhu ezikhulu zikahulumeni, nezibalo zezimoto ezilwisana ukubusa isikhashana emigwaqweni
Ngithi mhlawumbe sesimbalwa nje esisakhumbula lapho utshani babusakhula khona
Sekwakhiwa manje ukuba kudayiswe izimpahla ezephukayo
Abasekho abasakhumbula lapho kwakusanda khona izihlahla zemvelo kungakabi bikho izimoba zobugqila
Emuva Kwethu
Acabe-ke mbila la mathambo owabafica embiwe emgedeni
Lo mpheme ngowakho manje, izolo ube ngowethu
La manzi ezikhukhula namachancala owawabalekela
Thina sadliwa yiwo nanxa ulwandle lwande lwaze lwasukuma phezu kunobude bomhume
Owaphenduka umlomo omkhulu wenhlanzi yetshe
Yidla-ke mbila ehamb’ ipholile
Nasi isihlabathi siphole sesimanziswa ozamcolo
Usulobile kuso ezakho izinyathelo phansi nasodakeni
Kwangathi wenze umfanekiso okhambeni
Licabe-ke mbila ithambo lekhanda lihleli enqwabeni
Andukuba kukhululeke isithunzi sami somphefumulo